အမှုတော်ဆောင်များနေ့(Pastor Appreciation Day)အကြောင်း
နိဒါန်း
နှစ်စဉ်နှစ်တိုင်းရဲ့၁၀လပိုင်းဒုတိယပတ်တနင်္ဂနွေနေ့ဟာအပြည်ပြည်ဆိုင်ရာခရစ်ယာန်အမှုတော်ဆောင်များနေ့ဆိုပြီးအနောက်နိုင်ငံခရစ်ယာန်အများစုကပြုလုပ်ကြပါတယ်။မြန်မာပြည်ခရစ်ယာန်တွေမှာတော့Pastor sundayအဖြစ်ပြုလုပ်နေတဲ့အသင်းတော်တချို့ရှိကြပေမဲ့၊တွင်တွင်ကျယ်ကျယ်မသိရှိကြသေးတာမို့အများကြီးမပြုလုပ်ကြသေးပါဘူး။တချို့ဆိုကြားတောင်မကြားဖူးကြသူရှိကြပါတယ်။ဒါကြောင့်အကျဉ်းချုပ်ဖော်ပြပါရစေ။
၁။အမှုတော်ဆောင်များနေ့ပေါ်ပေါက်လာပုံ
1992ကတည်းကအမေရီကန်မိသားစုခရစ်ယာန်အသင်းတော်တွေကနေ(Focus on the Family, James Dobson）layperson Jerry Frear, Jr.တို့ကစတင်ပြုလုပ်ဖို့နိုးဆော်ခဲ့ကြတာလို့လေ့လာရပါတယ်။အခုထိအမေရီကန်ရဲ့တရားဝင်အသိအမှတ်ပြုတဲ့နေ့ရက်မဟုတ်သေးပေမဲ့အနောက်နိုင်ငံအသင်းတော်အများစုတော့နှစ်စဉ်ပြုလုပ်လေ့ရှိကြတယ်လို့ဆိုပါတယ်။၁၀လပိုင်းတစ်လလုံးကိုလည်းအမှုတော်ဆောင်များကိုကျေးဇူးတင်တုန့်ပြန်ပေးကမ်းတဲ့လလို့သတ်မှတ်ပြုလုပ်ကြပါတယ်။
၂။အခြေပြုကျမ်းချက်များ
(၁သက်၅:၁၂-၁၃ ညီအစ်ကိုတို့၊ သင်တို့တွင် အမှုတော်ကိုဆောင်ရွက်ခြင်း၊ သခင်ဘုရားအခွင့်နှင့် အုပ်စိုးခြင်း၊ သတိပေးခြင်း အမှုကိုပြုသောသူတို့ကို သိမှတ်၍၊သူတို့ပြုသောအမှုကြောင့် မေတ္တာစိတ်နှင့် အလွန်ချစ်ခင်လေးမြတ်မည်အကြောင်း၊ ငါတို့သည် တောင်းပန်ကြ၏။)
(၁တိ၅:၁၇-၁၈ကောင်းမွန်စွာအုပ်သော သင်းအုပ်တို့သည် အလှူနှစ်ဆကို ခံထိုက်သောသူဖြစ်သည် ဟူ၍လည်းကောင်း၊ တရားဟောခြင်း၊ ဆုံးမဩဝါဒပေးခြင်းအမှုကို ကြိုးစားအားထုတ်သောသူတို့သည်၊ အလှူနှစ်ဆကို အထူးသဖြင့် ခံထိုက်သောသူဖြစ်သည် ဟူ၍လည်းကောင်း မှတ်ရမည်။အကြောင်းမူကား၊ စပါးနင်းနယ်သောနွား၏နှုတ်ကို မချုပ်တည်းရဟု ကျမ်းစာလာ၏။ တစ်ချက်ကား၊ လုပ်ဆောင်သောသူသည် အခကို ခံထိုက်ပေးသည်ဟု လာပြန်၏။)
၃။အမှုတော်ဆောင်များရဲ့ပေးဆပ်ခြင်း
(၁)မိဘတယောက်လိုယုံကြည်သူတွေကိုဘုရားစကားနဲ့ပြုစု၊ပျိုးထောင်၊လမ်းပြ၊ဆုတောင်းကူညီနေသူပါ။
(၂)ဆရာဝန်တစ်ယောက်လိုယုံကြည်သူတွေရဲ့ဝိညာဉ်ရေးရာအဖျားမှန်သမျှကိုသက်သာအောင်ဘုရားစကားနဲ့အမြဲကုစားပေးနေသူပါ။
(၃)အလုပ်သမားတစ်ယောက်လိုယုံကြည်သူတွေအတွက်ဘုရားဝတ်၊တရားဝတ်မှာအမြဲအစေခံပေးနေသူပါ။
(၄)စစ်သားတစ်ယောက်လိုယုံကြည်သူတွေအတွက်ရှေ့တန်းကနေအယူလွဲဝါဒအပါအဝင်လမ်းလွဲစေနိုင်တဲ့အရာကိုအမုန်းခံပြီးကာကွယ်ပေးနေသူပါ။ဧဝံဂေလိလည်းပြုနေရသူပါ။
၄။သင့်အမှုတော်ဆောင်ကိုကျေးဇူးပြုပါ။
(၁)သူတို့ရဲ့ပေးဆပ်မှုကိုအသိအမှတ်ပြုပြီးသူတို့ကိုရိုသေလေးစားတန်ဖိုးထားပါ။
(၂)သူတို့လည်းအားနည်းတတ်တာမို့သူ့တို့အတွက်အမြဲဆုတောင်းပေးပါ။သူတို့မှားနေရင်မေတ္တာနဲ့သတိပေးပါ။
(၃)သူတို့ဟာလောကီစီးပွားမလုပ်ဘဲအမှုတော်ဆောင်နေသူမို့သင့်ဆယ်ဖို့တစ်ဖို့နဲ့သူတို့ရဲ့စားဝတ်နေရေးကိုထောက်ပံ့ပါ။
(၄)သူတို့ရဲ့အမှုတော်ဆောင်ခြင်းမှာသင်လက်တွေ့ပါဝင်ကူညီပေးပါ၊ဒါမှသူတို့အားရှိလာပြီးရှေ့ဆက်နိုင်မှာပါ။
နိဂုံး
မြန်မာအသင်းတော်တွေမှာလည်းဓမ္မအမှုတော်ဆောင်များနေ့ကိုတွင်တွင်ကျယ်ကျယ်ပြုလုပ်သင့်တယ်လို့မြင်ပါတယ်။အရင်ကမကြားဖူမလုပ်ဖူးရင်လဲအခုကြားသိရပြီးရင်မိမိအသင်းတော်မှာအတူဆွေးနွေးတိုင်ပင်အကြံပေးပြီး“ဓမ္မအမှုတော်ဆောင်များနေ့”ကိုသတ်မှတ်ပြုလုပ်သင့်ပါကြောင်းတိုက်တွန်းနိုးဆော်လိုက်ပါတယ်။