လှိုင်းတံပိုးကြားကယုံကြည်ခြင်း
နိဒါန်း
လောကီပင်လယ်ပြင်ကို ဖြတ်သန်းနေကြတဲ့ ကျွန်ုပ်တို့ရဲ့ လူ့ဘဝခရီးလမ်းမှာ “လှိုင်းတံပိုး” ဆိုတာ ရှောင်လွှဲလို့မရတဲ့ အရာတစ်ခုပါ။ လှိုင်းတံပိုးဟာ ပြင်းထန်ရင် ကြောက်စရာကောင်းသလို၊ အခန့်မသင့်ရင် အသက်အန္တရာယ်အထိ ဒုက္ခပေးနိုင်ပါတယ်။ လွန်ခဲ့တဲ့ နှစ်ပေါင်းများစွာက တပည့်တော်တော်တွေဟာ ဂါလိလဲအိုင်ကို ဖြတ်ကူးစဉ်မှာ ပြင်းထန်တဲ့ လှိုင်းတံပိုးဒဏ်ကို ခံခဲ့ရပြီး သေဘေးကို ရင်ဆိုင်ခဲ့ရပါတယ်။ ဒါပေမဲ့ သူတို့ရဲ့ စိုးရိမ်ထိတ်လန့်မှုတွေဟာ ယေရှုခရစ်တော်ကြောင့် ငြိမ်းချမ်းခြင်းအဖြစ် ပြောင်းလဲသွားခဲ့ပါတယ်။
ယနေ့ ကျွန်ုပ်တို့ အသက်တာမှာလည်း ရေလှိုင်းတွေနဲ့ အမြဲမကြုံရပေမဲ့၊ စားဝတ်နေရေး၊ ကျန်းမာရေးနဲ့ စိတ်သောကတည်းဟူသော “ဘဝလှိုင်းတံပိုး” တွေကို လူတိုင်း ကြုံတွေ့နေရပါတယ်။ ဒီလှိုင်းတံပိုးတွေကြားကနေ ယုံကြည်ခြင်းနဲ့ ဘယ်လိုအောင်မြင်စွာ ရုန်းထွက်မလဲဆိုတာကို သမ္မာကျမ်းစာလာ (ရှင်မဿဲ ၁၄:၂၂-၃၃) ပါ အဖြစ်အပျက်ကို အခြေခံပြီး အချက် (၃) ချက်နဲ့ ဝေငှလိုပါတယ်။
၁။ မကြောက်နှင့်၊ယေရှုသည်သင့်အနားမှာအမြဲရှိတယ်။(မဿဲ၁၄:၂၂-၂၇)
တပည့်တော်တွေ လှေပေါ်မှာ လှိုင်းဒဏ်ကို ပြင်းစွာခံနေရတဲ့ ညအချိန်မှာ ယေရှုခရစ်တော်ဟာ ရေပေါ်မှာ လမ်းလျှောက်ပြီး သူတို့ဆီ ကြွလာခဲ့ပါတယ်။ အစပိုင်းမှာ တပည့်တော်တွေဟာ ထိတ်လန့်ပြီး “ဖုတ်တစ္ဆေ” လို့ ထင်မှတ်ကာ အော်ဟစ်ခဲ့ကြပေမဲ့ ကိုယ်တော်က “တည်ကြည်သောစိတ်ရှိကြလော့၊ ငါပင်ဖြစ်သည်။ မကြောက်လန့်ကြနှင့်” လို့ ချက်ချင်း နှုတ်ဆက် ခွန်အားပေးခဲ့ပါတယ်။
ဘဝရဲ့ အမှောင်ဆုံးအချိန်၊ လှိုင်းတံပိုး အပြင်းဆုံးအချိန်တွေမှာ ကျွန်ုပ်တို့ တစ်ယောက်တည်း မဟုတ်ဘူးဆိုတာကို သတိရဖို့ လိုပါတယ်။ ကိုယ်တော်ဟာ ကျွန်ုပ်တို့ရဲ့ ဘေးနားမှာ အမြဲရှိနေပြီး “ငါရှိတယ်၊ မကြောက်နဲ့” လို့ ပြောနေပါတယ်။ ကိုယ်တော် ရှိနေခြင်းဟာ ကြောက်ရွံ့ခြင်းကို အောင်နိုင်တဲ့ ပထမဆုံးသော သော့ချက် ဖြစ်ပါတယ်။
၂။ ယုံကြည်ခြင်းကိုဘုရားစကားပေါ်၌သာတည်ဆောက်ပါ။(မဿဲ၁၄:၂၇-၂၉)
ယေရှုခရစ်တော်ရေပေါ်မှာလမ်း လျှောက်လာတဲ့အခါ၊တပည့်တော် ပေတရုက ယေရှုမှန်ရင် သူ့ကိုလည်း လာဖို့ အမိန့်ပေးပါလို့ တောင်းဆိုခဲ့ပါတယ်။ ယေရှုက “လာခဲ့လော့” လို့ တစ်ခွန်းတည်းသော စကားကို မိန့်တော်မူတဲ့အခါ ပေတရုဟာ ထိုစကားကို ယုံကြည်ပြီး လှေပေါ်ကနေ ဆင်းကာ ရေပေါ်မှာ လမ်းလျှောက်နိုင်ခဲ့ပါတယ်။
ယုံကြည်ခြင်းဆိုတာ မိမိရဲ့ စိတ်ကူးယဉ်မှု မဟုတ်ဘဲ ဘုရားသခင်ရဲ့ ကတိတော်နဲ့ စကားတော်ပေါ်မှာ တည်ဆောက်ခြင်း ဖြစ်ပါတယ်။ လှိုင်းတံပိုးတွေ ဘယ်လောက်ကြီးပါစေ၊ ဘုရားသခင်ရဲ့ “စကားတော်” ကို ကိုင်စွဲထားနိုင်ရင် ကျွန်ုပ်တို့ဟာ လောကရဲ့ မဖြစ်နိုင်တဲ့ အခြေအနေတွေကို ကျော်လွှားနိုင်မှာ ဖြစ်ပါတယ်။
၃။ လှိုင်းတံပိုးထက်ယေရှုခရစ်တော်ကိုသာအာရုံပြုပါ။(မဿဲ၁၄:၂၉-၃၃)
ပေတရုဟာ ရေပေါ်မှာ လမ်းလျှောက်နေရင်းကနေ “လေပြင်းသည်ကို မြင်လျှင်” ကြောက်လန့်ပြီး ရေထဲကို နစ်မြုပ်သွားခဲ့ပါတယ်။ ပေတရုရဲ့ အမှားဟာ အာရုံစိုက်မှုကို လှိုင်းတံပိုးဆီ ပြောင်းလဲလိုက်ခြင်း ဖြစ်ပါတယ်။ ဒါပေမဲ့ သူ “ကယ်မတော်မူပါ” လို့ ဟစ်ကြော်တဲ့အခါ ယေရှုက လက်တော်ကို ဆန့်ပြီး ချက်ချင်း မစခဲ့ပါတယ်။ သူတို့နှစ်ဦး လှေပေါ်ရောက်တဲ့အခါမှာတော့ လေပြင်းတွေ ငြိမ်းသွားခဲ့ပါတယ်။
ကျွန်ုပ်တို့ရဲ့ အသက်တာမှာလည်း ပြဿနာ (လှိုင်းတံပိုး) ကိုပဲ ကြည့်နေရင် ယုံကြည်ခြင်း အားနည်းပြီး နစ်မြုပ်သွားတတ်ပါတယ်။ ပြဿနာထက် ကြီးမြတ်တဲ့ ယေရှုခရစ်တော်ကိုသာ အမြဲအာရုံပြုမယ်ဆိုရင် ဘယ်လို လေပြင်းမျိုးကိုမဆို အောင်မြင်စွာ ဖြတ်ကျော်နိုင်မှာ ဖြစ်ပါတယ်။အာမင်။
နိဂုံး
ဘဝလှိုင်းတံပိုးတွေဟာ ကျွန်ုပ်တို့ကို နစ်မြုပ်အောင် ဒုက္ခပေးနိုင်ပေမဲ့၊ ယေရှုခရစ်တော်ကို ယုံကြည်ကိုးစားတဲ့သူအတွက်တော့ အဲဒီလှိုင်းတံပိုးတွေဟာ ဘုရားသခင်ရဲ့ ဘုန်းတော်ကို မြင်တွေ့ရမယ့် အခွင့်အရေးတွေ ဖြစ်လာပါတယ်။ လှိုင်းတံပိုးတွေကို ကြည့်ပြီး ကြောက်ရွံ့နေမယ့်အစား၊ ကျွန်ုပ်တို့အနားမှာ ရှိနေတဲ့ ကိုယ်တော့်ကို အာရုံပြုပြီး စကားတော်ကို ယုံကြည်ခြင်းဖြင့် လျှောက်လှမ်းကြပါစို့။လှေပေါ်ကို ကိုယ်တော် ရောက်လာတဲ့အခါ လေပြင်းတွေ ငြိမ်းသွားသလို၊ သင့်ရဲ့ ဘဝထဲခရစ် တော်ရောက်လာခဲ့ရင်၊သင့်ဘဝလှိုင်းတံပိုးတွေကိုလည်း ကိုယ်တော် ငြိမ်ဝပ်စေမှာ ဖြစ်ပါတယ်။အာမင်။
မူရင်း-ဆရာရဲမင်း