ယေရှုခရစ်ရဲ့မွေးရင်းညီနဲ့နှမများ
မယ်တော်မာရိမှာယေရှုခရစ်ကလွဲလို့တခြားသားသမီးမရှိခဲ့ဘူးလား( ယေရှုမှာညီနဲ့နှမရှိမရှိ)ဆိုတာကိုမေးလာလို့ကျမ်းစာအရအနည်းငယ်ချပြပါ့မယ်။သတိထားရမှာကယေရှုခရစ်ကိုမမွေးခင်အထိမာရိဟာအပျိုစင်စစ်စစ်ပါ၊ယေရှုကိုမွေးပြီးနောက်တော့သာမန်အမျိုးသမီးတွေလိုအိမ်ထောင်သားသမီးရှိခဲ့ကြောင်းဖော်ပြပါမယ်။
၁။ယေရှုခရစ်ကိုမွေးပြီးနောက်မာရိဟာယောသပ်နဲ့အိမ်ထောင်ပြုပြီးသားသမီးဆက်မွေးခဲ့ကြောင်းကျမ်းစာအရနားလည်ရပါတယ်။
မဿဲ၁:၂၅ သို့သော်လည်း၊ သားဦး ကို မဖွားမီတိုင်အောင် သံဝါသမပြုဘဲနေ၏။ ထိုသားကိုလည်း ယေရှုဟူသောအမည်ဖြင့် မှည့်လေ၏။
လုကာ၂:၇သားဦးကိုဖွားမြင်၍ အဝတ်နှင့်ပတ်ရစ်ပြီးမှ၊ ဧည့်သည်တည်းရာဇရပ်၌ သူတို့နေစရာမရှိသောကြောင့်၊ သူငယ်ကို နွားစားခွက်၌ သိပ်ထားလေ၏။
(ရှင်မဿဲနဲ့လုကာရေးတဲ့“သားဦး”ဆိုတာသူ့နောက်မှာသားတွေဆက်ရှိကြောင်းဖော်ပြတဲ့အရေးအသားပါ)။
၂။မဿဲ၁၂:၄၆၊မာကု၃:၃၁၊လုကာ၈:၁၉-၂၁မှာတူညီတဲ့ကိစ္စရပ်တခုမှတ်တမ်းတင်ထားပါတယ်။အဲတာကတော့ယေရှုကိုသူ့မိခင်နဲ့ညီတွေလာရှာခြင်းပါ။တနည်းအားဖြင့်ယေရှုခရစ်မှာမွေးရင်းညီတွေရှိကြောင်းသက်သေပါ။
(မဿဲ၁၂:၄၆ထိုသို့ ပရိသတ်တို့အား ဟောတော်မူစဉ်တွင်၊ မယ်တော်နှင့် ညီတော်တို့သည် နှုတ်ဆက်လို၍ ပြင်မှာ ရပ်နေကြ၏။)
(မာကု၃:၃၁ထိုအခါ မယ်တော်နှင့် ညီတော်တို့သည် လာ၍ ပြင်မှာရပ်နေလျက်၊ တစ်စုံတစ်ယောက်သောသူကို ကိုယ်တော်ထံသို့ စေလွှတ်၍ ခေါ်ကြ၏။)
(လုကာ၈:၁၉-၂၁ထိုအခါ မယ်တော်နှင့် ညီတော်တို့သည် လာ၍ စည်းဝေးသောသူများသောကြောင့်၊ ကိုယ်တော်ရင်းသို့ မချဉ်းကပ်နိုင်ဘဲ နေကြ၏။)
၃။ကျမ်းစာအရယေရှုခရစ်မှာမွေးရင်းညီ၄ယောက်(နာမည်နှင့်တကွ)နဲ့နှမတွေရှိကြောင်းဖော်ပြပါတယ်။
မဿဲ၁၃:၅၅-၅၆သူသည် လက်သမားသား မဟုတ်လော။ သူ့အမိကား မာရိအမည်ရှိသည် မဟုတ်လော။ သူ့ညီကား၊ ယာကုပ်၊ ယောသေ၊ ရှိမုန်၊ ယုဒဟုဆိုကြသည် မဟုတ်လော။- သူ့နှမများတို့သည်လည်း ငါတို့နှင့် အနီးအပါးနေကြသည် မဟုတ်လော။
၄။ညီတော်တွေကအကိုဖြစ်တဲ့ယေရှုခရစ်ကိုနဂိုကမယုံကြည်ကြခဲ့ပါဘူး။နောက်ပိုင်းမှယုံလာကြတာပါ။
ယောဟန်၇:၁-၅ ထိုနောက်မှ ယေရှုသည် ဂါလိလဲပြည်၌ လှည့်လည်တော်မူ၏။ ယုဒလူတို့သည် ကိုယ်တော်ကို သတ်အံ့သောငှာ ရှာကြံသောကြောင့်၊ ယုဒပြည်၌ လှည့်လည်ခြင်းငှာ အလိုတော်မရှိ။ ယုဒလူတို့၏ သကေနေပွဲခံခါနီးတွင်၊- ညီတော်တို့က၊ သင်ပြုသောအမှုတို့ကို တပည့်များတို့သည် မြင်စေခြင်းငှာ ဤအရပ်မှထွက်၍ ယုဒပြည်သို့ကြွပါ။- ကျော်စောကိတ္တိကို အလိုရှိသောသူမည်သည်ကား မထင်ရှားသောအားဖြင့် အဘယ်အမှုကိုမျှ မပြုတတ်။ ဤအမှုတို့ကို သင်သည်ပြုလျှင်၊ ဤလောက၌ ကိုယ်ကိုထင်ရှားစွာ ပြပါဟု၊- မယုံကြည်သောကြောင့် ယေရှုအားဆိုကြ၏။
၅။ယုဒရှကာယုတ်နေရာအစားထိုးတမန်တော်ခန့်ဖို့ဆုတောင်းစည်းဝေးတဲ့လူ(၁၂၀)မှာမယ်တော်နဲ့ညီတော်တို့လဲပါဝင်ခဲ့ ကြောင်းကျမ်းစာကဖော်ပြပါတယ်။
တမန်၁:၁၄ထိုသူအပေါင်းတို့သည် ယေရှု၏မယ်တော်မာရိမှစ၍ မိန်းမတို့နှင့်လည်းကောင်း၊ ညီတော်တို့နှင့်လည်းကောင်း၊ တညီတညွတ်တည်း ကြိုးစား၍ ဆုတောင်းပတ္ထနာပြုလျက် နေကြ၏။
၆။ယာကုပ်ဟာယေရှုခရစ်ရဲ့ညီတော်ဖြစ်ကြောင်းရှင်ပေါလုကလည်းသက်သေခံပြောဆိုခဲ့ပါတယ်။
ဂလာ၁:၁၈-၁၉ ထိုနောက် သုံးနှစ်လွန်ပြီးမှ ပေတရုကို အကျွမ်းဝင်လိုသောငှာ၊ ယေရုရှလင်မြို့သို့သွား၍ သူနှင့်အတူ တစ်ဆယ်ငါးရက်နေ၏။သူနှင့် သခင်ဘုရား၏ညီတော် ယာကုပ်မှတစ်ပါး အခြားသော တမန်တော်တစ်ယောက်ကိုမျှ ငါမတွေ့မမြင်။
၇။အရင်းနဲ့ဝမ်းကွဲမူရင်းစကားလုံး
တချို့ကဒီ“ညီတော်”တွေဟာဝမ်းကွဲတွေသာဖြစ်တယ်လို့ပြောတာရှိပါတယ်။အမှန်ကမူရင်းဂရိစကားလုံးကိုလေ့လာရင်ဒါဟာ ဝမ်းကွဲမဟုတ်ဘဲ၊မွေးရင်းညီတွေဖြစ်ကြောင်းသိရပါမယ်။ဘာလို့လဲဆိုတော့ဂရိလိုမှာညီဝမ်းကွဲလို့သုံးရမဲ့စကားလုံးရှိနေပေမဲ့ကျမ်းစာမှာညီလို့သာသုံးထားလို့ဖြစ်ပါတယ်။
(ညီအရင်းကိုမူရင်းဂရိလို“adelphos”နဲ့သုံးပြီး၊သာမန်ညီဝမ်းကွဲကိုဂရိလို“anepsios”နဲ့သုံးပါတယ်။သက်သေအနေနဲ့၊ဂလာတိ၄:၁၀မှာမာကုဟာဗာနဗနဲ့ညီဝမ်းကွဲဖြစ်ကြောင်းဒီစကားလုံးကိုအသုံးပြုထားပါတယ်)။
၈။မိခင်နဲ့အမြဲနေခြင်းသက်သေ
နောက်တခုကညီတော်တွေကိုဖော်ပြတိုင်းမှာသူတို့တွေဟာမယ်တော်နဲ့အတူအမြဲရှိနေတာကလည်းသက်သေခိုင်လုံစေတဲ့အရာပါ။သမ္မာကျမ်းစာ(ယော၂:၁၂၊မဿဲ၁၂:၄၆-၄၇၊တမန်၁:၁၄)မှာမယ်တော်ကိုဖော်ပြတိုင်းညီတော်တွေနဲ့အမြဲအတူရှိနေတာတွေ့ရပါတယ်။အကယ်၍ညီဝမ်းကွဲတွေဆိုရင်ကိုယ့်အဒေါ်နဲ့အမြဲနေနေမှာမဟုတ်ပါဘူး။အမြဲနေနေခြင်းကမိသားစုဝင်မှန်းသက်သေထင်ရှားလှပါတယ်။
၉။ယေရှုထက်အသက်ငယ်နေခြင်းသက်သေ
နောက်တချို့ကယောသပ်အသက်ကြီးသူဖြစ်လို့မာရိမတိုင်ခင်နဂိုအိမ်ထောင်သားသမီးတွေရှိခဲ့တာလို့ဆိုကြပြန်ပါတယ်၊ဒါဆိုရင်စဉ်းစားရမှာကဒီရှေ့အိမ်ထောင်ကကလေးတွေဟာယေရှုထက်ကြီးနေတာမို့ယေရှုရဲ့ညီတော်လို့ကျမ်းစာကပြောစရာမရှိပါ၊မိသားစုလိုက်အီဂျစ်ကိုထွက်ပြေးရတုန်းကအပါအဝင်တခြားဘယ်နေရာမှာမှယောသပ်ရှေ့အိမ်ထောင်သားသမီးရှိကြောင်းမဖော်ပြပါ။ဒါကြောင့်ယောသပ်ကိုအရင်အိမ်ထောင်ရှိခဲ့ကြောင်းအဆိုကဘယ်လိုမှမဖြစ်နိုင်ပေ။
ငြင်းခုန်ဖို့မဟုတ်ပါ၊နားလည်စေဖို့သာတင်ပြခြင်းဖြစ်ပါတယ်။ဝိညာဉ်တော်အလင်းပေးပါစေ။အာမင်။