အခက်ခဲပြဿနာထဲကဘုရားစကား(၇)ခွန်း

အခက်ခဲပြဿနာထဲကဘုရားစကား(၇)ခွန်း

နိဒါန်း
ခရစ်တော်၌ငြိမ်သက်ခြင်းရှိပါစေ။ခုတလောကိုဗစ်၁၉ကြောင့်စီးပွားရေးကျပ်တည်းတဲ့အခက်ခဲ၊လူမှုရေးမှာစိမ်းကားလာတဲ့အခက်ခဲ၊ကျန်းမာ‌‌ရေးကိုအထူးဂရုစိုက်နေရတဲ့အခက်ခဲ၊ဘာသာရေးမှာဘုရား‌ကျောင်းတွေပိတ်ထားရလို့အသင်းတော်လည်ပတ်မှုအဆင်မပြေတဲ့အခက်ခဲ၊နောက်ပြီးကိုယ်စီမတူညီတဲ့ပြဿနာအခက်ခဲတွေအများကြီးပါ။ဒီထဲမှာကျွန်တော်တို့ယုံကြည်သူဘုရားသားသမီး‌တွေဘုရားသခင်ကိုမေးခွန်းတွေအများကြီးမေးလာတတ်ကြပါပြီ၊ဘာကြောင့်လဲပေါ့?ဆိုတော့ဒီအရာကိုအဖြေရဖို့ကျမ်းစာထဲကဘုရားစကားအချက်(၇)ချက်နဲ့ဒီနေ့ခွန်အားပေးသွားမှာဖြစ်ပါမယ်။

၁။ဘုရားသင့်နဲ့အတူရှိနေတယ်။
(အကယ်၍ သေ​မင်း၏​အ​ရိပ်​လွှမ်း​မိုး​သော​ချိုင့်​ထဲ​သို့ လျှောက်​သွား​ရ​သော်​လည်း ဘေး​အ​န္တ​ရာယ်​ကို မ​ကြောက်​ပါ။ အ​ကြောင်း​မူ​ကား၊ ကိုယ်​တော်​သည် အ​ကျွန်ုပ်​နှင့်​အ​တူ​ရှိ​တော်​မူ​သည်​ဖြစ်၍၊ လှံ​တံ​တော်​နှင့် တောင်​ဝှေး​တော်​သည် အ​ကျွန်ုပ်​ကို ချမ်း​သာ​စေ​ပါ၏။ဆာလံ 23:4 )
တရုတ်ဆိုရိုးစကားတခုရှိပါတယ်“ 家家都有难念的一本经”မိသားစုတိုင်းမှာဖတ်ရခက်ခဲတဲ့စာအုပ်ကိုယ်စီရှိကြပါသတဲ့။အဓိပ္ပာယ်က‌လူတိုင်းလူတိုင်းမှာမတူညီကြတဲ့အခက်ခဲပြဿနာကိုယ်စီရှိနေကြကြောင်းပါ။ကြုံ‌တွေ့နေရတဲ့အခက်ခဲပြဿနာသာအနည်းနဲ့အများကွာသွားမှာပါလူတိုင်း‌ တော့အခက်ခဲကိုယ်စီရှိနေကြတာပါဘဲ။ဒါပေမယ့်ယုံကြည်သူဘုရားသားသမီးတွေမှာမတူညီတာလေးကဘုရားကတိတော်ရှိနေတာပါဘဲ။သေမင်းရဲ့ဘေး​အ​န္တ​ရာယ်​ထိတောင်ကြုံနေရပေမယ့်လည်းမကြောက်ပါနှင့်တဲ့၊ဘာကြောင့်လဲဆိုတော့သင်ကိုးကွယ်တဲ့ဘုရားသခင်ဟာယ‌နေ့သင့်နဲ့အတူအမြဲရှိနေတယ်ဆိုတာသတိယပါ။ဟာလေလုယာ။ဘုရားသခင်ဟာသိုးထိန်းသူတွေလိုသူတို့ကိုင်တဲ့လှံတံတော်(ရန်သူကိုကာကွယ်ပေးခြင်း)၊တောင်ဝေးတော်(ဘေးဘေးအန္တရာယ်ကျရောက်ချိန်ကယ်တင်ပေးခြင်း)နဲ့သူ့သားသမီးတွေကိုအမြဲကြည့်ရှုကာကွယ်နေတာယုံကြည်ပါ။ဘုရားအလို‌ တော်ရှိတဲ့အခက်ခဲဟာသင့်ကိုရင့်ကျက်သန်မာစေဖို့နဲ့ဘုန်းတော်ထင်ရှားစေဖို့ဖြစ်ပါတယ်။အာမင်။

၂။ယေရှုကြောင့်ညှင်းဆဲခံရတာမင်္ဂလာတပါးပါ။
(ငါ့​ကြောင့် သင်​တို့​ကို ကဲ့​ရဲ့​ညှဉ်း​ဆဲ၍ မ​မှန်​ဘဲ​လျက် အ​ပြစ်​တ​ကာ တင်​ကြ​သော​အ​ခါ၊ သင်​တို့​သည် မင်္ဂ​လာ​ရှိ​ကြ၏။ရှင်မဿဲ5:11） (အ​ဘယ်​သို့​နည်း​ဟူ​မူ​ကား၊ ခ​ရစ်​တော်​ကြောင့် ငါ​တို့​ခံ​ရ​သော ဆင်း​ရဲ​ခြင်း​သည် အ​လွန်​များ​ပြား​သည်​နည်း​တူ၊ ခ​ရစ်​တော်၏ ကျေး​ဇူး​အား​ဖြင့် ငါ​တို့​ခံ​ရ​သော သက်​သာ​ခြင်း​သည်အ​လွန်များပြား၏။၂ကော1:5 )
ခရစ်ယာန်ယုံကြည်သူ‌တွေမှာသတိမထားမိတဲ့အ‌ ရေးကြီးအရာအများကြီးထဲကတခုပြောရရင်ခရစ်တော်ကြောင့်ညှင်းဆဲခံရတာကိုမင်္ဂလာလို့မခံယူဘဲစိတ်တိုပြီးပြန်ဆဲနေကြတာပါဘဲ။ချစ်သောညီကိုမောင်နှမတို့၊ကျမ်းစာထဲမှာယေရှုခရစ်ကိုယ်တိုင်ရှင်းရှင်းလေးပြောထားတာသတိရပါ၊ယေရှုခရစ်ကြောင့်ယနေ့သင်အဆဲခံနေရပြီလား?လှောင်ပြောင်ကဲ့ရဲ့ခံနေရပြီလား?အဲလိုဖြစ်နေရင်ကျေးဇူးတော်ချီးမွမ်းလိုက်ပါ၊ဒါဟာတောင်ပေါ်မင်္ဂလာ၈ပါးထဲကယေရှုခရစ်ဟောခဲ့တဲ့နောက်ဆုံးမင်္ဂလာတပါးမို့ပါ။သူများတကာတွေယေရှုခရစ်ကြောင့်သင့်ကိုဆဲဆိုကဲ့ရဲ့လာတာသင့်ဖက်ကပြန်ဆဲဖို့မဟုတ်သလိုဂလဲ့စားချေဖို့လည်းမဟုတ်ဘူး၊တဖက်သားကိုကောင်းကြီးပေးကျေးဇူးတင်လိုက်ပါ။ဘုရားဆီအပ်နှံလိုက်ပါ၊ဘုရားစီရင်သွားပါလိမ့်မယ်။သင့်အနေနဲ့ဒီလိုလုပ်ခြင်းအားဖြင့်မင်္ဂလာရှိသောသူ၊သာ၍‌ ကျေးဇူးတော်ခံရသောသူဖြစ်လာပါလိမ့်မယ်၊အာမင်။(ဒါပေမယ့်ချွင်းချက်အနေနဲ့ခရစ်တော်ကြောင့်ခံရတဲ့အရာကိုဆိုလိုတာပါ၊မိမိအမှားကြောင့်အပြစ်ပေးခံရတာကိုခရစ်တော်ကြောင့်လို့တော့နာမည်မခံသင့်ပါ။ယုံကြည်သူတွေမိမိအမှားကြောင့်ညှင်းဆဲအပြစ်ပေးခံရရင်နောင်တရဖို့နဲ့အပြစ်ဝန်ချဖို့ဘဲလိုပါတယ်။)

၃။သင့်ကောင်းကျိုးဖြစ်စေဖို့ပါ။
(ဘုရားသခင်ကို​ကို ချစ်​သော​သူ​တည်း​ဟူ​သော ကြံ​စည်​တော်​မူ​ခြင်း​အ​တိုင်း ခေါ်​တော်​မူ​သော​သူ​တို့၏​အ​ကျိုး​ကို ခပ်​သိမ်း​သော​အ​ရာ​တို့​သည် တ​ညီ​တ​ညွတ်​တည်း ပြု​စု​ကြ​သည်​ကို ငါ​တို့​သိ​ကြ၏။ရောမဩဝါဒစာ 8:28 )
ဒီကျမ်းချက်ကအခက်ခဲပြဿနာကြုံတွေ့သူတိုင်းအလွတ်ကျက်ထားသင့်တဲ့ကျမ်းချက်ပါ။အဓိပ္ပာယ်ကဘာလဲဆိုတော့ယုံကြည်သူဘုရားသားသမီးတွေဘဝအသက်တာမှာအ‌ကောင်းအဆိုးဘာဘဲကြုံကြုံ၊ကြုံလာတဲ့အရာအားလုံးဟာဘုရားသားသမီးတွေရဲ့အကျိုးအတွက်ဖြစ်ပါတယ်ဆိုတာပါ။ဟာ‌‌လေလုယာ။တနည်းအားဖြင့်ဘုရားသားသမီးတွေရဲ့အသက်တာထဲမှာဘုရားအလိုတော်မရှိဘဲဆံပင်လေးတပင်တောင်ကျပိုင်ခွင့်မရှိပါဘူး။ဟာလေလုယာ၊ဒါကြောင့်ကြုံတွေ့နေရတဲ့အခက်ခဲပြဿနာကိုအဆိုးမြင်ဝါဒီနဲ့ဘုရားကိုမေးခွန်းထုတ်နေတာထက်၊ဒီအရာတွေဟာဘုရားခွင့်ပြုလို့ငါ့အသက်တာထဲရောက်လာတယ်လို့ခံယူပြီးအသက်ရှင်ပါ။လူတွေကြံစည်လို့မမှီနိုင်တဲ့ငြိမ်သက်ခြင်းခံစားရပါလိမ့်မည်။အာမင်။(ချွင်းချက်အနေနဲ့မိမိတမင်တကာအပြစ်လုပ်ပြီးဖြစ်လာတဲ့ပြဿနာကတော့ဘုရားအလို‌ တော်မဟုတ်ပါ။)

၄။သူတပါးကိုသက်သေခံစေဖို့ပါ။
(ငါတို့သည် ဘု​ရား​သ​ခင်၏ ကျေး​ဇူး​တော်​အား​ဖြင့် ကိုယ်​တိုင် သက်​သာ​ခြင်း​ရှိ​သ​ကဲ့​သို့၊ ဆင်း​ရဲ​ခြင်း အ​မျိုး​မျိုး​ကို ခံ​ရ​သော​သူ​တို့​အား သက်​သာ​စေ​နိုင်​မည်​အ​ကြောင်း၊ ဆင်း​ရဲ​ခြင်း​အ​မျိုး​မျိုး​တို့၌ ဘု​ရား​သ​ခင်​သည် ငါ​တို့​အား သက်​သာ​စေ​တော်​မူ၏။၂ကော 1:4 )
ယုံကြည်သူဘုရားသားသမီးအနေနဲ့ဒုက္ခပြဿနာတွေကြုံတွေ့ရတဲ့အခါ၊ဘုရားသခင်နဲ့ပိုနီးပြီးသင်ခန်းစာတွေတပွေ့တပိုက်ရလာခဲ့ကြတာအများကြီးပါ။ဆိုလိုတာကအခက်ခဲပြဿနာထဲမှာဘုရားရဲ့ကောင်းမြတ်ခြင်းတွေကိုပိုမြင်တတ်လာစေတာဖြစ်တယ်၊အခက်ခဲပြေလည်သွားတဲ့အခါမှ၊အော် ဘုရားသခင်ကျေးဇူးတော်ပါလားလို့ပြန်လည်သက်‌သေခံလာကြတဲ့ယုံကြည်သူ‌တွေအများကြီးရှိခဲ့ပါတယ်။ဒါကြောင့်ယနေ့သင်ကြုံတွေ့နေတဲ့အခက်ခံပြဿနာသည်သင့်အတွက်သက်သေခံစရာ၊ဘုန်းတော်ထင်ရှားစရာဖြစ်လာနိုင်ပါတယ်၊ဒါမှကိုယ့်အနီးနားကလူတွေအလားတူပြဿနာကြုံတွေ့လာရင်သက်သေခံပြီးခွန်အားပေးနိုင်မှာပါ။အာမင်။

၅။သီးခံခြင်းကိုပြုစုတတ်ဖို့ပါ။
(သင်တို့၏ယုံကြည်ခြင်းကို စစ်​ကြော​စုံ​စမ်း​ခြင်း​အ​ရာ​သည် သည်း​ခံ​ခြင်း​ကို ပွား​စေ​တတ်​သည်​ဟု သိ​မှတ်​လျက်၊ အ​ထူး​ထူး​အ​ပြား​ပြား စုံ​စမ်း​နှောင့်​ယှက်​ခြင်း​နှင့် တွေ့​ကြုံ​သော​အ​ခါ၊ ဝမ်း​မြောက်​စ​ရာ​အ​ကြောင်းသက်​သက်​ဖြစ်​သည်​ဟု မှတ်​ကြ​လော့။ရှင်ယာကုပ်1:2‭-‬3 ၊ရောမဩဝါဒစာ5:3 )
ဒီကျမ်းချက်ထဲမှာပြောထားတဲ့အရာကသာမန်အခက်ခဲပြဿနာမျိုးမဟုတ်ဘဲကိုးကွယ်ယုံကြည်မှုနဲ့ပတ်သက်တဲ့အခက်ခဲ၊တနည်းအားဖြင့်စုံစမ်းစစ်‌ ကြောခြင်းပေါ့။ချစ်သောညီကိုမောင်နှမတို့၊ဘုရားသခင်ကမယုံကြည်သူနဲ့အခြားသူတွေကိုအသုံးပြုပြီးယနေ့သင့်ယုံကြည်ခြင်းကိုစစ်ကြောနိုင်ပါတယ်၊အဓိကကတော့ဒီစစ်ကြောခြင်းအားဖြင့်သင်သီးခံနိုင်စွမ်းရှိလာဖို့ပါ။ဒါကြောင့်ယုံကြည်ကိုးကွယ်မှုဆိုင်ရာပြဿနာကြုံလာရင်ပြန်တုန့်ပြန်တာမျိုးမဟုတ်ဘဲ၊သီးခံခြင်းကိုသင်ယူဖို့မမေ့ပါနဲ့။

၆။လောကကိုအောင်နိုင်စေဖို့ပါ။
(သင်တို့သည် ငါ့​ကို​အ​မှီ​ပြု၍ ငြိမ်​သက်​ခြင်း​ရှိ​စေ​ခြင်း​ငှာ ဤ​စ​ကား​ကို​ငါ​ဟော​ပြော​ပြီ။ သင်​တို့​သည် လော​က၌ ဆင်း​ရဲ​ဒု​က္ခ​ကို ခံ​ရ​ကြ​လိမ့်​မည်။ သို့​သော်​လည်း မ​စိုး​ရိမ်​ကြ​နှင့်။ ငါ​သည် လော​က​ကို​အောင်​ပြီ​ဟု မိန့်​တော်​မူ၏။
ရှင်ယောဟန် 16:33 )
ယုံကြည်သူဘုရားသားသမီးတွေယ‌နေ့အထူးသတိပြုရမှာကခရစ်တော်ရဲ့စကားထဲမှာသူ့ကိုယုံကြည်ရင်မုချအဆင်ပြေချောမွေ့မယ်လို့လုံးဝမပြောခဲ့ဘူးဆိုတာပါဘဲ။ဒါပေမယ့်ဒီနေ့များစွာသောတရားဟောဆရာတွေဟာယုံကြည်သူမှန်ရင်ကျန်းမာရမယ်၊ချမ်းသာရမယ်၊ရောဂါမကူးဘူး၊အခက်ခဲမရှိဘူးလို့ဟော‌လာနေကြပါပြီ။ဒါကိုယုံကြည်သူအများကြီးနှစ်သက်ကြလို့ဒီနောက်လိုက်နေကြပါပြီ။ချစ်သောညီကိုမောင်နှမတို့၊
ယေရှုခရစ်ထဲမှာကျန်းမာခြင်းချမ်းသာခြင်းနဲ့အဆင်ပြေချောမွေ့ခြင်းမရှိတာမဟုတ်ပါဘူး၊ရှိပါတယ်၊ဒါပေမယ့်မုချအဲလိုလုပ်ပေးမယ်လို့မပြောခဲ့ပါဘူး၊ဘာကြောင့်လဲဆိုတော့ယေရှုခရစ်ကခေတ္တအရာထက်ထာဝရအရာကိုစွဲလမ်းစေချင်လို့ပါ။ယေရှုခရစ်ပြောခဲ့တာကိုကြုံဖူးရင်သင်နားလည်လာပါလိမ့်မယ်“သင်တို့သည်‌ လောက၌ဆင်းရဲဒုက္ခကြုံရလိမ့်မယ်”တဲ့။သေချာစဉ်းစားပြီးချင့်ချိန်ပါညီကို‌မောင်နှမတို့။ယေရှုစကားယုံမှာလား?တရားဟောဆရာစကားယုံမှာလား?ယေရှုစကားကိုသာအကြွင်းမဲ့ယုံကြည်ပါ။လောကမှာဆင်းရဲဒုက္ခကြုံရမယ်၊ဒါပေမယ့်မစိုးရိမ်ကြနှင့်၊ယေရှုဟာလောကကိုအောင်ပြီဖြစ်လို့ယုံကြည်သူ‌‌တွေလဲယေရှုခရစ်အားဖြင့်လောကကိုအောင်မြင်ရမည်၊ဟာလေလုယာ။ဆင်းရဲဒုက္ခကို‌ အောင်မြင်သွားပြီဆိုတာအဆင်ပြေချောမွေ့ပြီးချမ်းသာသွားတာမျိုးတော့မဟုတ်ပါဘူး၊ရှင်ပေါလုလိုဆင်းရဲခြင်းချမ်းသာခြင်းနဲ့အဆင်ပြေခြင်းမပြေခြင်းကိုဘယ်လိုရင်ဆိုင်ရမလဲဆိုတာသိသွားတာပါ။အာမင်။
(ရှုတ်​ချ​ခြင်း​ကို​လည်း​ကောင်း၊ ကြွယ်​ဝ​ခြင်း​ကို​လည်း​ကောင်း၊ ခံ​တတ်၏။ ဝ​စွာ​စား​ခြင်း၊ မွတ်​သိပ်​ခြင်း၊ စည်း​စိမ်​ရှိ​ခြင်း၊ ဆင်း​ရဲ​ခြင်း​တို့​ကို ခံ​ရ​အံ့​သော​ငှာ၊ အ​ရပ်​ရပ်​တို့​တွင် အ​ရာ​ရာ၌ သင်​မိ​ပြီ။- ငါ့​ကို ခွန်​အား​နှင့်​ပြည့်​စုံ​စေ​တော်​မူ​သော ခ​ရစ်​တော်​အား​ဖြင့် ခပ်​သိမ်း​သော​အ​မှု​တို့​ကို ငါ​တတ်​စွမ်း​နိုင်၏။-ဖိလိပ္ပိ4:12‭-‬13 ）

၇။ထာဝရအရာကိုအဓိကထားစေဖို့ပါ။
(အ​ကြောင်း​မူ​ကား၊ မျက်​မှောက်၌​ထင်​ရှား​သော အ​ရာ​တို့​သည် ခ​ဏ​သာ​တည်၍ မ​ထင်​ရှား​သော​အ​ရာ​တို့​သည် အ​စဉ်​အ​မြဲ​တည်​ကြောင်း​ကို ငါ​တို့​သည် ထောက်​လျက်၊ ထင်​ရှား​သော အ​ရာ​တို့​ကို မ​ကြည့်​မ​မှတ်​ဘဲ မ​ထင်​ရှား​သော​အ​ရာ​တို့​ကို ကြည့်​မှတ်​ကြ​စဉ်​အ​ခါ၊ ယ​ခု​ခ​ဏ​ခံ​ရ၍ ပေါ့​ပါး​သော ဆင်း​ရဲ​ခြင်း​ဒု​က္ခ​သည် အ​တိုင်း​ထက်​အ​လွန် ကြီး​မြတ်​လေး​လံ​သော နိ​စ္စ​ထာ​ဝ​ရ​ဘုန်း​အ​သ​ရေ​ကို ငါ​တို့​အ​ဖို့ ဖြစ်​စေ​တတ်၏။၂ကော 4:17 ၊ရောမဩဝါဒစာ8:18 )
နောက်ဆုံးကျမ်းချက်တချက်က၊ယနေ့ယုံကြည်သူသားသမီးတွေကိုဘုရားသခင်နှစ်သိမ့်ပေးနေတာဖြစ်ပါတယ်။သင်ယခုကြုံတွေ့နေရတဲ့အခက်ခဲပြဿနာဘယ်လောက်ကြီးပါစေ၊ကျော်လွန်သွားပါလိမ့်မယ်၊ဒါ‌တွေဟာခေတ္တပါ။ဒီအရာတွေမှာသစ္စာရှိရှိယုံကြည်ခြင်းခိုင်မာတည်ကြည်ခဲ့ရင်ထာဝရဘုန်းအ‌သရေအတွက်အကျိုးဖြစ်လာပါလိမ့်မယ်။ဒါကြောင့်ခေတ္တဘဝမှာအခက်ခဲပြဿနာကြုံတွေ့တိုင်းထာဝရဘုန်းအသရေခံစားရမှာကိုမျှော်ကြည့်ပါ။လောကမှာအိုခြင်း၊နာခြင်း၊သေခြင်းကိူလူတိုင်းကြုံတွေ့ရမှာပါ။မတူညီတာငယေရှုခရစ်ကိုယုံကြည်တဲ့ဘုရားသားသမီးတွေဟာနိစ္စထာဝဘုန်းအသရေကိုရရှိမှာဖြစ်ကြောင်းအမြဲခွန်အားယူပါ။

နိဂုံး
ဒီနေ့ဟောသွားတာက
အခက်ခဲပြသနာကြားမှာသင့်အတွက်ဘုရားစကားဘဲဖြစ်ပါတယ်။
အခက်ခဲပြသနာကြားထဲမှာ
၁။ဘုရားသခင်သင့်နဲ့အတူရှိကြောင်း
၂။ယေရှုခရစ်ကြောင့်ညှင်းဆဲခံရတာမင်္ဂလာဖြစ်ကြောင်း
၃။အခက်ခဲဟာသင့်ကောင်းကျိုးအတွက်ဖြစ်တည်လာမှာဖြသ်ကြောင်း
၄။အခက်ခဲကြောင့်ဘုရားရဲ့သက်သေဖြစ်လာနိုင်ကြောင်း
၅။အခက်ခဲပြဿနာဟာသီးခံတတ်စေဖို့ဖြစ်ကြောင်း
၆။လောကကိုအောင်နိုင်ဖို့ဖြစ်ကြောင်း
၇။နိစ္စထာဝရအရာကိုအလေးထားတတ်လာစေဖို့ဖြစ်ကြောင်းခွန်အားယူခဲ့ကြတာဖြစ်ပါတယ်။
ယောက်ဆီတိုင်းကိုဘုရားသခင်ကောင်းကြီးပေးပါစေ။အာမင်။