ပေးလှူခြင်းရဲ့ကောင်းကြီး(၇)မျိုး
၁။ကောင်းကြီးအဆများစွာဖြစ်စေတယ်။
ပေးလှူခြင်းဟာအစုရှယ်ရာပါဝင်ခြင်းနဲ့တူပြီး၊ကောင်းကြီးအဆပေါင်းမြောက်များစွာပြန်ခံစားရတတ်ပါတယ်။ကောင်းကြီးပြန်ရဖို့ပေးလှူတာမဟုတ်ပေမယ့်၊ပေးလှူသူတိုင်းကိုဘုရားပြန်ကောင်းကြီးပေးတာတော့အမှန်ပါဘဲ။
(၂ကော၉:၆၊၁၀အနည်းငယ်သောမျိုးစေ့ကို ကြဲသောသူသည် စပါးအနည်းငယ်သာရိတ်ရမည်။များစွာကြဲသောသူသည် များစွာရိတ်ရမည်ဟု မှတ်ကြလော့။…မျိုးစေ့ကြဲသောသူအား မျိုးစေ့ကိုလည်းကောင်း၊ အစာအာဟာရကိုလည်းကောင်း၊ ပေးတော်မူသောသူသည်၊ သင်တို့အား မျိုးစေ့ကို ပေး၍ ပွားများစေတော်မူမည်။ သင်တို့၏ ဖြောင့်မတ်ခြင်းကိုလည်း ကြွယ်ဝစေတော်မူမည်။)
၂။ပျော်ရွှင်ကျေနပ်ခြင်းဖြစ်စေတယ်
စေတနာစိတ်ဆိုတာမူရင်းကျမ်းစာထဲမှာ ဘုရားသခင်ကိုကျေးဇူးတင်ချင်လွန်းလို့မထိန်းချုပ်နိုင်ဘဲပေးလှူခြင်းပါ။ဒါဟာပျော်ရွှင်ကြည်နူးပြီးကျေနပ်ခြင်းကိုဖြစ်စေပါတယ်။
(၂ကော၉:၇လူတိုင်း ကိုယ်အလိုအလျောက် လှူရ၏။ နှမြောသောစိတ်နှင့် မလှူရ၊ မလှူဘဲမနေရဟု စိတ်ထင်နှင့် မလှူရ၊ အကြောင်းမူကား၊ စေတနာစိတ်နှင့် လှူသောသူကိုသာ ဘုရားသခင် နှစ်သက်တော်မူ၏။)
၃။ဖြောင့်မတ်ခြင်းသက်သေရစေတယ်။
ပေးလှူလို့ဖြောင့်မတ်တာမဟုတ်ရပါဘူး၊ယေရှုခရစ်ကိုယုံကြည်ပြီးဖြောင့်မတ်သူဖြစ်လာလို့ဖြောင့်မတ်ခြင်းရဲ့သက်သေအဖြစ်ပေးလှူကြတာဖြစ်ပါတယ်။ပေးလှူခြင်းဟာမိမိဖြောင့်မတ်သူဖြစ်ကြောင်းသာ၍သက်သေရစေပါတယ်။
(၂ကော၉:၈ကျမ်းစာလာသည်ကား၊ သူသည်စွန့်ကြဲပြီ၊ ဆင်းရဲသောသူတို့အား ပေးကမ်းပြီ။သူ၏ဖြောင့်မတ်ခြင်းသည် အစဉ်အမြဲတည်တတ်၏)
၄။မင်္ဂလာမျိုးစုံနဲ့ပြည့်စုံစေတယ်
ပေးလှူတတ်တဲ့သူတွေကိုဘုရားသခင်ကဥစ္စာအမျိုးမျိုး၊ကောင်းသောအကျင့်အမျိုးမျိုး၊မင်္ဂလာဆုကျေးဇူးမျိုးစုံနဲ့ပြည့်စေနိုင်တယ်လို့ကျမ်းစာကဆိုထားပါတယ်။
(၂ ကော၉:၉သင်တို့သည် အရာရာ၌ သုံးလောက်သော ဥစ္စာအမျိုးမျိုးနှင့် အစဉ်ရှိ၍၊ ကောင်းသော အကျင့်အမျိုးမျိုးနှင့် အထူးသဖြင့် ပြည့်စုံမည် အကြောင်း၊ အမျိုးစုံသောမင်္ဂလာကျေးဇူးနှင့် အထူးသဖြင့် ပြည့်စုံစေခြင်းငှာ ဘုရားသခင် တတ်နိုင်တော်မူ၏။)
၅။အခြားသူတွေဘုရားကိုမြင်လာစေတယ်။
ခရစ်ယာန် တွေရဲ့ပေးလှူခြင်းဟာမိမိကိုယ်ကိုပေါ်လွင်စေခြင်းမဟုတ်ဘဲ၊ဘုရားသခင်ကိုလူတွေမြင်လာစေခြင်းဖြစ်ပါတယ်။မိမိရဲ့ပေးလှူမှုလေးကြောင့်လူတွေအများကြီးကယ်တင်ခြင်းရသွားခြင်းဟာထာဝရကောင်းကြီးဖြစ်ပါတယ်။
(၂ကော၉:၁၁-၁၃ထိုသို့သင်တို့သည် စေတနာစိတ်နှင့် အမျိုးမျိုးသော စွန့်ကြဲပေးကမ်းခြင်းအလိုငှာ အရာရာ၌ကြွယ်ဝခြင်း ရှိသည်ဖြစ်၍၊ ငါတို့အားဖြင့် ဘုရားသခင်၏ ကျေးဇူးတော်ကို ချီးမွမ်းစရာအကြောင်း ရှိလိမ့်မည်။… သူတို့သည် အောက်မေ့သောအခါ၊ ဤလုပ်ကျွေးခြင်းအမှု၏ လက္ခဏာ သက်သေကိုထောက်၍ ဘုရားသခင်၏ ကျေးဇူးတော်ကို ချီးမွမ်းတတ်ကြ၏။)
၆။ယုံကြည်ခြင်းရဲ့သက်သေဖြစ်စေတယ်။
ပေးလှူခြင်းဟာယေရှုခရစ်တော်ကိုယုံကြည်လို့၊ဧဝံဂေလိတရားကိုလိုက်စားတဲ့သက်သေဖြစ်စေပါတယ်။
(၂ ကော၉:၁၃သင်တို့သည် ခရစ်တော်၏ ဧဝံဂေလိတရား အလိုသို့ ထင်ရှားစွာလိုက်ခြင်း အလိုကိုလည်းကောင်း၊ ထိုသန့်ရှင်းသူတို့မှစသော လူအပေါင်းတို့အား ကြည်ညိုသော စေတနာစိတ်နှင့် စွန့်ကြဲပေးကမ်းခြင်း အရာကိုလည်းကောင်း၊…)
၇။ထပ်ဆင့်ကောင်းကြီးရစေတယ်။
ပေးလှူသူဟာကောင်းကြီးရလို့ဘုရားရဲ့ကျေးဇူးကိုပြန်လည်ချီးမွမ်းရေတွက်တာဖြစ်ပါတယ်။ဒါကိုဘုရားသခင်ကကောင်းကြီးထပ်ဆင့်ပေးမှာဖြစ်သလို၊ပေးလှူခံရသူရဲ့ဆုတောင်းကောင်းကြီးပေးခြင်းကိုလည်းရရှိမှာပါ။
(၂ကော၉:၁၄-၁၅သင်တို့၌ ထူးမြတ်သောဘုရားသခင်၏ ကျေးဇူးတော်ကိုလည်း သူတို့သည်ထောက်လျှင်၊ သင်တို့အဖို့ အလိုငှာ ဆုတောင်း၍၊ အလွန်ချစ်ခင်မြတ်နိုးခြင်းစိတ် ရှိကြ၏။- ပြော၍မကုန်နိုင်သော ဘုရားသခင်၏ ဆုကျေးဇူးတော်ကို အောက်မေ့၍ ချီးမွမ်းခြင်းရှိစေသတည်း။)