ပွဲတော်မင်္ဂလာအနှစ်သာရ(၅)ချက်
နိဒါန်း
ခရစ်ယာန်အသင်းတော်တိုင်းမှာတစ်လတစ်ကြိမ်ပွဲတော်မင်္ဂလာဝတ်ဆိုပြီးပြုလုပ်လေ့ရှိကြပါတယ်။ဒါဟာသခင်ယေရှုကိုယ်တိုင်အသင်းတော်အတွက်လုပ်ကြပါဆိုပြီးမိန့်မှာခဲ့တာမို့ပါ။ဒါပေမဲ့ပွဲတော်သာပြုလုပ်နေကြတာ၊ပွဲတော်ရဲ့အဓိပ္ပာယ်မသိကြသူတွေကများနေတာတွေ့ရပါတယ်။ဒါကြောင့်ပွဲတော်ကိုဘာကြောင့်စားရတာလဲဆိုတဲ့ပွဲတော်မင်္ဂလာအနှစ်သာရ(၅)ချက်ကိုအကျဥ်းချုပ်ဖော်ပြခွန်အားပေးပါမယ်။ဒါမှပွဲတော်စားတိုင်းပိုအကျိုးရှိလာမှာပါ။
၁။ယေရှုခရစ်ရဲ့ကယ်တင်ပေးခြင်းကိုအောက်မေ့ခြင်း
ပွဲတော်မှာစားတဲ့မုန့်နဲ့စပျစ်ရည်ဟာသခင်ယေရှုခရစ်ရဲ့အသား(ခန္ဓာ)တော်နဲ့အသွေးတော်ကိုပုံဆောင်ပါတယ်။တနည်းအားဖြင့်ပွဲတော်စားသောက်ခြင်းတိုင်းဟာယေရှုခရစ်ရဲ့အပြစ်သားတွေအတွက်အသွေးသွန်းပြီးအသေခံသွားတဲ့ကယ်တင်ခြင်းကိုအမြဲအမှတ်ရခြင်းပါ။
(၁ကော၁၁:၂၃-၂၆ သခင်ယေရှုသည်ရန်သူလက်သို့အပ်နှံခြင်းကကိုခံသောနေ့ညမှာမုန့်ကိုယူ၍၊ကျေးဇူးတော်ကိုချီးမွမ်းပြီးမှမုန့်ကိုဖဲ့၍၊ဤမုန့်ကား၊ သင်တို့အဖို့အလိုငှာချိုးဖဲ့သောငါ၏ကိုယ်ဖြစ်၏။ယူ၍စားကြလော့။ငါ့ကိုအောက်မေ့ဖို့ရာဤသို့ပြုကြလော့ ဟုမိန့်တော်မူ၏။ထိုနည်းတူ၊ညစာစားပြီးမှခွက်ကိုလည်းယူ၍၊ ဤခွက်ကားငါ၏အသွေး၌တည်သောပဋိညာဉ်တရားသစ်ဖြစ်၏။ဤခွက်ကိုသောက်သောအခါခါ၊ငါ့ကိုအောက်မေ့ဖို့ရာသောက်ကြလော့ဟုမိန့်တော်မူ၏။)
၂။မိမိကိုယ်ကိုစစ်ကြောပြီးအပြစ်ဝန်ချခြင်း
ပွဲတော်ဝင်တိုင်းမှာဆင်ခြင်ရမှာက-မထိုက်တန်တဲ့ငါ့ကိုယေရှုဘုရားကအသက်ပေးပြီးကယ်တင်သွားတာမို့၊ငါအခုသူ့စကားကိုနားထောင်နေပြီလား?ကျေးဇူးကန်းပြီးအပြစ်လုပ်နေတုန်းလားဆိုတာဆင်ခြင်ဖို့ပါ။အပြစ်ပြုနေရင်နောင်တရဝန်ချတိုးဝင်ဖို့ပါ။အပြစ်ပြုထားလျက်နဲ့မဝန်ချဘဲပွဲတော်ဝင်နေရင်မိမိအပြစ်ကိုစားသောက်မိနိုင်ပါတယ်။
(၁ကော၁၁:၂၈-၂၉ သို့ဖြစ်၍ လူတိုင်း ကိုယ်ကိုကိုယ်စစ်ကြောပြီးမှမုန့်ကိုစားစေ။ထိုနည်းတူခွက်ကိုလည်းသောက်စေ။အကကြောင်းမူကား၊မထိုက်မတန်ဘဲစားသောက်သောသူသည်သခင်ဘုရား၏ကိုယ်တော်ကိုပိုင်းခြား၍မသိသောကြောင့်၊မိမိအပေါ်သို့အပြစ်ရောက်စေခြင်းငှာစားသောက်သောသူဖြစ်၏။)
၃။ပဠိညာဉ်တရားသစ်နဲ့ဆိုင်ကြောင်းဝန်ခံခြင်း
ပဠိညာဉ်ဆိုတဲ့စကားလုံးအဓိပ္ပာယ်ကသဘောတူထားတဲ့ကတိကဝတ်ဖြစ်ပါတယ်။ကျမ်းစာထဲကပြောတဲ့ပဠိညာဉ်တရားသစ်ဆိုတာကတော့ဘုရားသခင်ကနေသားတော်ယေရှုကိုယုံကြည်လက်ခံသောသူတိုင်းကိုထာဝရအပြစ်လွတ်မှာကိုကတိတော်ပြုထားခြင်းပါ။ဒါကြောင့်ပွဲတော်စားတိုင်းမှာငါဟာခွင့်လွတ်ခံရတဲ့ဖြောင့်မတ်သူ၊ထာဝရအသက်ရာနူန်းပြည့်သေချာသောသူဖြစ်ကြောင်းပြန်လည်အတည်ပြုခိုင်ခံ့စေတာပါ။
(၁ကော၁၁:၂၅ ထိုနည်းတူ၊ ညစာစာပြီးမှ ခွက်ကိုလည်းယူ၍၊ ဤခွက်ကား ငါ၏အသွေး၌ တည်သော ပဋိညာဉ်တရားသစ် ဖြစ်၏။ ဤခွက်ကိုသောက်သောအခါခါ၊ငါ့ကိုအောက်မေ့ဖို့ရာသောက်ကြလော့ဟု မိန့်တော်မူ၏။)
၄။ယုံကြည်သူချင်းနှင့်မိသဟာရရှိခြင်း
ပွဲတော်ဝင်ခြင်းကတစ်ယောက်ထဲလုပ်လို့ရတဲ့အရာမဟုတ်ပါဘူး၊တခြားယုံကြည်သူတွေနဲ့(အသင်းတော်မှာ)အတူပြုရတဲ့အရာပါ။ဒါဟာတနည်းအားဖြင့်မိမိတစ်ယောက်ထဲယုံကြည်အသက်ရှင်နေတာမဟုတ်ဘဲ၊အသင်းတော်ဆိုတဲ့ခရစ်တော်ခန္ဓာနဲ့အတူရှိကြောင်း၊ယုံကြည်သူချင်းမိသဟာရဖွဲ့ခြင်း၊တလုံးတဝတသားတကိုယ်ထဲဖြစ်ကြောင်းသက်သေပြုတာပါ။
(၁ကော၁၂:၁၃ အကြောင်းမူကား၊ ယုဒလူဖြစ်စေ၊ဟေလသလူဖြစ်စေ၊ကျွန်ဖြစ်စေ၊လူလွတ်ဖြစ်စေ၊ငါတို့ရှိသမျှသည်ဝိညာဉ်တော်တပါးတည်းအားဖြင့်တကိုယ်တည်းထဲသို့ဗတ္တိဇံကိုခံကြ၏။ငါတို့ရှိသမျှသည် တစိတ် တဝိညာဉ် တည်းထဲသို့လည်း သောက်ကြ၏။)
၅။ထာဝရကာလကိုဝင်စားဖို့မြော်လင့်ခြင်း
ပွဲတော်ဝင်တိုင်း-ခရစ်တော်ပြန်လာမှာကိုစောင့်မျော်ဖို့၊တစ်ချိန်ကျရင်ခရစ်တော်နဲ့အတူထာဝရကာလမှာပွဲတော်စားသောက်ဖို့မုချဖြစ်လာမယ်ဆိုတာအမြဲသတိရမျော်လင့်ဖို့၊ကျမ်းစာကသွန်သင်ပါတယ်။ဒါကြောင့်ပွဲတော်ဝင်ခြင်းဟာတနည်းအားဖြင့်ယေရှုခရစ်ပြန်လာခေါ်မှာကိုယုံယုံကြည်ကြည်စောင့်မြော်နေခြင်းပါ။
(၁ကော၁၁:၂၆ အကြောင်းမူကား၊သင်တို့သည်ထိုမုန့်ကိုစား၍ ထိုခွက်ကို သောက်သောအခါခါ၊ သခင်ဘုရားအသေခံတော်မူခြင်းကို ကြွလာတော် မမူမီတိုင်အောင် ပြုကြ၏။)
နိဂုံး
ပွဲတော်မင်္ဂလာဝတ်ရဲ့အနှစ်သာရ(၅)ချက်
၁။ကယ်တင်ခြင်းကိုအမှတ်ရခြင်း
၂။မိမိကိုယ်ကိုစစ်ကြောခြင်း(အပြစ်ဝန်ချခြင်း)
၃။ပဠိညာဉ်တရားသစ်နဲ့ဆိုင်ကြောင်းဝန်ခံခြင်း
၄။ယုံကြည်သူချင်းနှင့်မိသဟာရရှိနေခြင်း
၅။ထာဝရကာလကိုဝင်စားဖို့မျော်လင့်ခြင်း။