ကယ်တင်ခြင်းစိတ်ချမှုကျမ်းချက်များ
၁။သင်ရထားတာထာဝရအသက်ဖြစ်သည်၊အကန့်သတ်ရှိတဲ့ခေတ္တအသက်မဟုတ်ပါ။
ယော၆:၄၇ငါအမှန်အကန်ဆိုသည်ကား၊ ငါ့ကို ယုံကြည်သောသူသည် ထာဝရအသက်ကိုရ၏။
၂။ယုံကြည်သူဟာဘုရားသားဖြစ်ပြီမို့၊သားအဖအရာသည်မပျက်နိုင်ပါ။
ယော၁:၁၂ထိုသူကိုလက်ခံသမျှသော သူတည်းဟူသော ကိုယ်တော်ကို ယုံကြည်သောသူတို့အား၊ ဘုရားသခင်၏ သားဖြစ်ရသောအခွင့်ကို ပေးတော်မူ၏။
ရောမ၈:၁၆ငါတို့သည် ဘုရားသခင်၏သားဖြစ်ကြသည်ဟု ဝိညာဉ်တော်သည် ငါတို့၏ဝိညာဉ်နှင့်အတူ သက်သေခံတော်မူ၏။
၃။တံဆိပ်ခတ်အတည်ပြုပေးပြီး ရွေးနုတ်တဲ့ကာလအထိအာမခံဖြစ်သည်။ဘုရားကမပိုင်ဘဲစရံသတ်တံဆိပ်ခတ်မှာမဟုတ်ပါ။
ဧဖက်၁:၁၃-၁၄သင်တို့သည်လည်း ကယ်တတင်တော်မူခြင်းအကြောင်းနှင့် ယှဉ်သော ဧဝံဂေလိတရားတည်းဟူသော သမ္မာတရားကိုကြားနာ၍ ထိုခရစ်တော်ကို ယုံကြည်ပြီးမှ၊ ကတိတော်နှင့်ယှဉ်သော သန့်ရှင်းသောဝိညာဉ်တော်၏ တံဆိပ်ခတ်ခြင်းကို ခံရကြပြီ။ပိုင်ထိုက်တော်မူသောသူတို့သည် ဘုန်းတော်ကို ချီးမွမ်းခြင်းအကြောင်းနှင့် ရွေးနုတ်တော်မူခြင်းသို့ မရောက်မီကာလပတ်လုံး ထိုဝိညာဉ်တော်သည် ငါတို့ အမွေ၏ စရန်ဖြစ်တော်မူ၏။
၄။ဒုတိယမွေးဖွားခြင်းခံပြီးသူတစ်ယောက်ကပြန်မမွေးအောင်ဗိုက်ထဲဝင်မရပါ။
ယော၃:၅-၇ယေရှုကလည်း၊ ရေနှင့် ဝိညာဉ်တော် မမွေးသောသူမည်သည်ကား၊ ဘုရားသခင်၏နိုင်ငံတော်သို့ မဝင်ရဟု ငါအမှန်အကန်ဆို၏။- ဇာတိပကတိမွေးသောအရာသည် ဇာတိပကတိဖြစ်၏။ ဝိညာဉ်တော်မွေးသောအရာသည် ဝိညာဉ်ဖြစ်၏။- ဒုတိယမွေးခြင်းကို ခံရမည်ဟု ငါဟောပြောသည်ကို အံ့ဩခြင်းမရှိနှင့်။
၅။သင်တည်ကြည်နိုင်လို့ကယ်တင်ခြင်းရတာမဟုတ်ဘူး၊ယုံကြည်လို့ကျေးဇူးတော်ကြောင့်ရတာမို့၊ကျင့်နိုင်မှရမယ်၊ခိုင်လုံမယ်လို့စိုးရိမ်စရာမရှိပါ။
ဧဖက်၂:၈-၉ယုံကြည်သောအားဖြင့် ကျေးဇူးတော်ကြောင့် ကယ်တင်ခြင်းသို့ ရောက်ရ၏။ ကိုယ်အလိုအလျောက် ရောက်သည်မဟုတ်။ ဘုရားသခင် သနားတော်မူရာ ဖြစ်သတည်း။ကိုယ်ကုသိုလ်ကြောင့် ကယ်တင်တော်မူခြင်းသို့ ရောက်သည်မဟုတ်။ သို့ဖြစ်၍ အဘယ်သူမျှ ဝါကြွားစရာ အခွင့်မရှိ။
၆။သင်ယုံကြည်နေတာမို့အဆုံးထိကောင်းနိုင်အောင်ခရစ်တော်တာဝန်ယူပါသည်။
ဖိလိပ္ပိ၁:၆သင်တို့တွင် ကောင်းသောအမှုကို ပြုစပြုတော်မူသောသူသည်၊ ယေရှုခရစ်၏ နေ့ရက်တိုင်အောင် ပြီးစီးလျက် ပြုတော်မူမည်ဟု ငါသဘောကျ၏။
၇။ပျက်စီးခြင်းနဲ့အစဉ်ကင်းလွတ်မည်လို့ကတိတော်ရှိပါတယ်။
ယော၁၀:၂၇ငါ့သိုးတို့သည် ငါ့စကားသံကိုနားထောင်၍ ငါ့နောက်သို့လိုက်ကြ၏။ ထိုသိုးတို့ကို ငါသိ၏။ထာဝရအသက်ကိုလည်း ငါပေး၏။ ထိုသိုးတို့သည် ပျက်စီးခြင်းနှင့် အစဉ်မပြတ် ကင်းလွတ်ကြလိမ့်မည်။
၈။ဘယ်သူမှဘုရားလက်ကနေသင့်ကိုမနုတ်ယူသွားနိုင်ပါ။
ယော၁၀:၂၈-၂၉အဘယ်သူမျှ ထိုသိုးတို့ကို ငါ့လက်မှမနုတ်မယူရာ။ထိုသိုးတို့ကို ငါ၌အပ်ပေးတော်မူသော ငါ့ခမည်းတော်သည် ခပ်သိမ်းသောသူတို့ထက် ကြီးမြတ်တော်မူသည်ဖြစ်၍၊ အဘယ်သူမျှ ထိုသိုးတို့ကို ငါ့ခမည်းတော်၏လက်မှ မနုတ်မယူနိုင်ရာ။
၉။ကမ္ဘာမတည်မီသင့်ကိုရွေးကောက်ခဲ့တာမို့စိတ်ချပါ။
ဧဖက်၁:၄ဤကမ္ဘာမတည်မရှိမီ ငါတို့ကို ခရစ်တော်၌ ရွေးကောက်တော်မူသည်နှင့်အညီ။ ကောင်းကင်ဘုံနှင့် ဆိုင်သောအရာတို့၌ ခပ်သိမ်းသော ဓမ္မမင်္ဂလာတို့ကို ခရစ်တော်အားဖြင့် ငါတို့အား ပေးသနားတော်မူသော ငါတို့သခင်ယေရှုခရစ်၏ ခမည်းတော်ဘုရားသခင်သည် မင်္ဂလာရှိတော်မူစေသတည်း။
၁၀။လူ့အကျင့်အားဖြင့်ကယ်တင်ခြင်းမရောက်ပါ။
ဂလာတိ၂:၆ယေရုခရစ်ကို ယုံကြည်ခြင်းအားဖြင့် ဖြောင့်မတ်ရာသို့ ရောက်ကြသည်ကို၊ အပြစ်ထင်ရှားသော တစ်ပါး အမျိုးသားမဟုတ်ဘဲ၊ ဇာတိအမျိုးအားဖြင့် ယုဒလူဖြစ်သောငါတို့သည် အမှန်သိသည်နှင့်အညီ ပညတ်တရား၏ အကျင့်အားဖြင့် ဖြောင့်မတ်ရာသို့မရောက်၊ ခရစ်တော်ကို ယုံကြည်ခြင်းအားဖြင့် ဖြောင့်မတ်ရာသို့ ရောက်ခြင်းငှာ၊ ငါတို့ပင် ယေရှုခရစ်ကို ယုံကြည်ကြပြီ။ အကြောင်းမူကား၊ ပညတ်တရား၏ အကျင့်အားဖြင့် အဘယ်သူမျှ ဖြောင့်မတ်ရာသို့ မရောက်နိုင်ရာ။
၁၁။ကယ်တင်ခြင်းသက်သေရရှိတာမို့ပိုသေချာစေသည်။ရလားမရလားဒွိဟမဖြစ်စေပါ။
၁ယော၅:၁၀ဘုရားသခင်၏သားတော်ကို ယုံကြည်သောသူသည်၊ မိမိအထဲ၌ ထိုသက်သေကိုရ၏။ ဘုရားသခင်ကို မယုံကြည်သောသူမူကား၊ ဘုရားသခင်ကို မုသားအပြစ်တင်၏။ အဘယ်သို့နည်း ဟူမူကား၊ ဘုရားသခင်သည် မိမိသားတော်၏အကြောင်းမှာ သက်သေခံတော်မူသောစကားတော်ကို ထိုသူသည် မယုံဘဲနေ၏။
၁၂။ကယ်တင်ခြင်းရရှိကြောင်းကျမ်းစာအားဖြင့်မိမိကိုယ်ကိုသိရှိနိုင်တာမို့ပိုခိုင်မာစေသည်။
၁ယော၅:၁၃ဘုရားသခင်၏သားတော်ကို ယုံကြည်သောသင်တို့သည် ထာဝရအသက်ကို ကိုယ်တိုင်ရသည်ဟု သိစေခြင်းငှာ၊ ဤအရာများကို သင်တို့အား ငါရေး၍ပေးလိုက်၏။
တမန်၁၃:၃၉ထိုသခင်ကို ယုံကြည်သောသူ ရှိသမျှတို့သည် မောရှေ၏ တရားအတိုင်း မလွတ်နိုင်သော အပြစ်ရှိသမျှတို့နှင့် လွတ်ရကြသည်ကိုလည်းကောင်း သိမှတ် ကြလော့။
၁၃။ယုံကြည်သူကိုခရစ်တော်ကအဆုံးထိဖြောင့်မတ်တည်ကြည်စေပါသည်။
ရောမ၈:၃၀ထိုသို့ ခွဲခန့်မှတ်သားနှင့်သောသူတို့ကို ခေါ်တော်မူ၏။ ခေါ်တော်မူသော သူတို့ကိုလည်း ဖြောင့်မတ်ရာ၌ တည်စေတော်မူ၏။ ထိုသို့ တည်စေတော်မူသော သူတို့ကိုလည်း ချီးမြှောက်တော်မူ၏။
၁၄။ကယ်တင်ခြင်းရပြီးသူတွေတစ် ယောက်မှမပျောက်ဆုံးအောင်ယေရှုခရစ်လုပ်ဆောင်မည်။
ယော၆:၃၉-၄၀ငါ့ကိုစေလွှတ်တော်မူသောခမည်းတော်၏ အလိုတော်ကား၊ ငါ့အားပေးသောသူတို့တွင် တစ်စုံတစ်ယောက်ကိုမျှ ငါမပျောက်စေရဘဲ၊ နောက်ဆုံးသောနေ့၌ ထိုသူအပေါင်းတို့ကို ထမြောက်စေခြင်းငှာလည်းကောင်း၊သားတော်ကို ကြည့်မြင်၍ ယုံကြည်သောသူရှိသမျှတို့သည် ထာဝရအသက်ကို ရစေခြင်းငှာလည်းကောင်း အလိုတော်ရှိ၏။ ငါသည်လည်း နောက်ဆုံးသောနေ့၌ ထိုသူတို့ကို ထမြောက်စေမည်ဟု မိန့်တော်မူ၏။
၁၅။ယုံကြည်နေသရွေ့ဘယ်အရာကမှသင့်ကိုဘုရား မေတ္တာနဲ့မကွာစေနိုင်ပါ။
ရောမ၈:၃၈-၃၉အကြောင်းမူကား၊ သေခြင်းဖြစ်စေ၊ အသက်ရှင်ခြင်းဖြစ်စေ၊ ကောင်းကင်တမန်ဖြစ်စေ၊ အထွဋ်အမြတ်ဖြစ်စေ၊ အာဏာတန်ခိုးဖြစ်စေ၊ မျက်မှောက်အရာဖြစ်စေ၊ နောင်လာလတ္တံ့သောအရာဖြစ်စေ၊- အမြင့်ဖြစ်စေ၊ အနိမ့်ဖြစ်စေ၊ ဤအရာမှစ၍ အဘယ်နိမ္မိတအရာမျှသည်၊ ငါတို့သခင်ယေရှုခရစ်အားဖြင့် ခံရသောဘုရားသခင်၏ မေတ္တာတော်နှင့် ငါတို့ကို မကွာစေနိုင်ဟု ငါသည်သဘောကျလျက်ရှိ၏။
၁၆။အသက်တာ ပြောင်းလဲလာခြင်းဖြင့်ကယ်တင်ခြင်းစိတ်ချရပြီးဖြစ် ကြောင်းသေချာရပါသည်။
၁ယော၃:၉-၁၀ဘုရားသခင်ဖြစ်ဖွားစေတော်မူသောသူ မည်သည်ကား၊ ဒုစရိုက်ကိုမပြုတတ်။ အကြောင်းမူကား၊ ထိုသူ၌ မျိုးစေ့တော်တည်လျက်ရှိ၏။ ထိုသူသည် ဘုရားသခင်ဖြစ်ဖွားစေတော်မူသောသူ ဖြစ်သောကြောင့် ဒုစရိုက်ကိုမပြုနိုင်။- ထိုသို့သောလက္ခဏာအားဖြင့် ဘုရားသခင်၏သားတို့နှင့် မာရ်နတ်၏သားတို့သည် ထင်ရှားကြ၏။ ဖြောင့်မတ်ခြင်းတရားကို မကျင့်သောသူ၊ မိမိညီအစ်ကိုကို မချစ်သောသူ မည်သည်ကား၊ ဘုရားသခင်နှင့်မဆိုင်။
၁၇။ကယ်တင်ခြင်းရပြီးရင်လဲအသက်တာမှာမလဲကျအောင်ခရစ်တော်စောင့်ရှောက်ပေးမည်။
ယုဒ၁:၂၄-၂၅ထိမိ၍လဲခြင်းနှင့် ကင်းလွတ်စေမည်အကြောင်း သင်တို့ကို စောင့်ရှောက်ခြင်းငှာလည်းကောင်း၊ အပြစ်မရှိဘဲ ဝမ်းမြောက်ခြင်းနှင့် ပြည့်စုံလျက်ရှိသော သင်တို့ကို ဘုန်းအသရေတော်ရှေ့၌ ဆက်သခြင်းငှာလည်းကောင်း တတ်နိုင်တော်မူသော သူတည်းဟူသော၊ငါတို့ကို ကယ်တင်တော်မူသောအရှင်၊ တစ်ဆူတည်းသောဘုရားသခင်သည်၊ ငါတို့သခင်ယေရှုခရစ်အားဖြင့်၊ ယခုမှစ၍ ကမ္ဘာအဆက်ဆက် ဘုန်းတန်ခိုးအာနုဘော်နှင့် အစွမ်းသတ္တိအာဏာစက် ရှိတော်မူစေသတည်း။ အာမင်။ ရှင်ယုဒဩဝါဒစာပြီး၏။
၁၈။ဘုရားအတူပါရှိတာမို့အဆုံးတိုင်ဘုရားစကားကိုစောင့်နိုင်မည်။
၂တိ၁:၁၂ထိုအကြောင်းကြောင့် ဤဆင်းရဲဒုက္ခကို ငါခံရ၏။ သို့သော်လည်း ရှက်ကြောက်ခြင်းမရှိ။ အဘယ်သူကို ငါယုံကြည်သည်ဟု ငါသိ၏။ သူ၌ ငါအပ်ထားသောအရာကိုလည်း၊ ထိုနေ့ရက်တိုင်အောင် စောင့်နိုင်တော်မူသည်ဟု ငါသဘောကျ၏။
၁၉။ဘုရားပေးတဲ့ကယ်တင်ခြင်း ကျေးဇူးကဖောက်ပြန်ခြင်းသဘောမရှိပါ။
ရောမ၁၁:၂၉အဘယ်သို့နည်းဟူမူကား၊ ဘုရားသခင် ပေးသနားတော်မူခြင်း၊ ခေါ်ထားတော်မူခြင်း ကျေးဇူးသည် ဖောက်ပြန်ခြင်းသဘောမရှိ။
၂၀။အစဉ်ကယ်တင်ခြင်းငှာဘုရားတတ်နိုင်ပါသည်။
ဟေဗြဲ၇:၂၅အကြင်သူတို့သည် ယေရှုအားဖြင့် ဘုရားသခင့်အထံတော်သို့ ချဉ်းကပ်ကြ၏၊ ထိုသူတို့၏အမှုကို ကိုယ်တော်သည် စောင့်လျက်၊ ကာလအစဉ် အသက်ရှင်သောကြောင့်၊ သူတို့ကို အစဉ်ကယ်တင်ခြင်းငှာ တတ်နိုင်တော်မူ၏။
၂၁။ယုံကြည်ခြင်းကိုအဆုံးထိစုံလင်စေနိုင်တာဘုရားသခင်မို့စိတ်ချပါ။
ဟေဗြဲ၁၂:၂ယုံကြည်ခြင်းကို အစအဦးစီရင်၍ စုံလင်စေတော်မူသော သခင်ယေရှုကို စေ့စေ့ထောက်ရှုကြကုန်အံ့။ ထိုသခင်သည် မိမိရှေ့၌ထားသော ဝမ်းမြောက်ခြင်း အကြောင်းကြောင့်၊ ရှက်ကြောက်သောအရာကို မမှတ်ဘဲ လက်ဝါးကပ်တိုင်၌ ခံပြီးမှ၊ ဘုရားသခင်၏ ပလ္လင်တော် လက်ယာဘက်၌ ထိုင်နေတော်မူ၏။
၂၂။ယုံကြည်သူဟာလောကကိုအောင်မြင်သောသူဖြစ်ပါတယ်။ကျရှုံးခဲ့ရင်ဘယ်လိုလုပ်မလဲဆိုပြီးမသင်ကာမရေရာတဲ့အသက်တာမျိုးမဟုတ်ပါ။
၁ယော၅:၄-၅ဘုရားသခင်၏သားဖြစ်သောသူ မည်သည်ကား၊ လောကကို အောင်တတ်၏။ လောကကို အောင်ခြင်းအကြောင်းမူကား၊ ငါတို့၏ ယုံကြည်ခြင်းပေတည်း။- ယေရှုသည် ဘုရားသခင်၏ သားတော်ဖြစ်သည်ကို ယုံကြည်သောသူမှတစ်ပါး၊ အဘယ်သူသည် လောကကို အောင်နိုင်သနည်း။
၂၃။သင့်ရဲ့တခါတ လေအားနည်းမှုကတခြားအရာတွေကိုဆုံးရှူံနိုင်စေပေမဲ့၊ကယ်တင်ခြင်းကိုတော့မထိခိုက်မဆုံးရှုံးစေနိုင်ပါ။
၁ကော၃:၁၅အကြင်သူ၏အလုပ်သည် ကျွမ်းလောင်၏၊ ထိုသူသည် အရှုံးခံရလိမ့်မည်။ သို့သော်လည်း၊ မီးနှင့်လွတ်သကဲ့သို့ သူသည် ကယ်တင်ခြင်းသို့ ရောက်လိမ့်မည်။
၂၄။သင့်ကိုတည်ကြည်စေတာဘုရားကိုယ်တိုင်ပါဘဲ။တရားသူကြီးကအပြစ်မရှိဘူးလို့အမိန့်ချလိုက်တာမို့သင်ရာဇဝတ်သားမဟုတ်တော့ပါ။ရှေ့လျှောက်အတွက်လည်းခရစ်တော်ကိုယ်တိုင်ဆုတောင်းပေးနေပါပြီ။
ရောမ၈:၃၃-၃၄ဘုရားသခင်ရွေးကောက်တော်မူသော သူတို့ကို အဘယ်သူသည် အပြစ်တင်မည်နည်း။ ဖြောင့်မတ်ရာ၌ တည်စေသောသူကား ဘုရားသခင်ပေတည်း။အပြစ်စီရင်သောသူကား အဘယ်သူနည်း။ အသေခံ၍ခံသည်သာမက၊ သေခြင်းမှထမြောက်၍ ဘုရားသခင်၏ လက်ယာတော်ဘက်၌နေလျက်၊ ငါတို့အဖို့ ဆုတောင်းသောသူကား ခရစ်တော်ပေတည်း။
၂၅။အသက်စမ်းရေကိုတခါသောက်တာနဲ့ထာဝရမငတ်တော့ပါ၊ကယ်တင်ခြင်းပိုင်းမှာရေငတ်လာမှာစိုးလို့တခုခုလုပ်နေမှရမယ်လို့မဖော်ပြပါ။အသက်တာပိုင်းတော့လုပ်ဆောင်မှုရှိနေရမည်ဖြစ်သည်။
ယော၄:၁၄ငါပေးသောရေကို သောက်သောသူမူကား၊ ရေငတ်ခြင်းနှင့်အစဉ်မပြတ် ကင်းလွတ်လိမ့်မည်။ ငါပေးသောရေသည် ထိုသူ၌ ထာဝရအသက်ရှင်ခြင်းအလိုငှာ ထွက်သောစမ်းရေဖြစ်လိမ့်မည်ဟု မိန့်တော်မူ၏။
၂၆။အသက်တာမှာ(တမင်တကာအပြစ်ပြုချင်လို့မဟုတ်ဘဲ)အားနည်းမိရင်တောင် နောင်တနဲ့ပြန်လာရင်ဘုရားကသင့်အတွက်ဖြေရှင်းပေးဖို့ကြိုတင်စီစဉ်ပြီးသားပါ။
၁ယော၂:၁-၂ချစ်သားတို့၊ သင်တို့သည် ဒုစရိုက်ကိုမပြုစေခြင်းငှာ ဤအရာများကို သင်တို့အား ငါရေး၍ပေးလိုက်၏။ တစ်စုံတစ်ယောက်သောသူသည် ဒုစရိုက်ကိုပြုမိလျှင်၊ ဖြောင့်မတ်တော်မူသော အရှင်ယေရှုခရစ်တည်းဟူသော ငါတို့အမှုဆောင်သခင်သည် ခမည်းတော်ထံ၌ ရှိတော်မူ၏။- ထိုသခင်သည် ငါတို့၏အပြစ်မက၊ လောကီသားအပေါင်းတို့၏ အပြစ်ဖြေစရာအကြောင်း ဖြစ်တော်မူ၏။
ဒါဆို-ကယ်တင်ခြင်းစိတ်ချပြီ၊မဆုံးရှူံးတော့ဘူးဆိုရင်၊အပြစ်အားရပါးရဆက်လုပ်ရပြီလား?
ဒါကိုရှင်ပေါလုဒီလိုဖြေပါတယ်
(ရောမ၆:၁-၂ ထိုသို့မှန်လျှင်၊ အဘယ်သို့ပြောရမည်နည်း။ကျေးဇူးတော်ပွားများစေခြင်းငှာ အပြစ်တရားကို ကျင့်၍ နေရမည်လော။ထိုသို့မနေရ။ အပြစ်တရားမှ စုတေ့သောသူတို့သည် ထိုတရား၌ အဘယ်သို့ ရှင်ရဦးမည်နည်း။)
ဒါကြောင့်ကယ်တင်ခြင်းရပြီဆိုပြီးနောင်တမရဘဲအပြစ်ဆက်လုပ်နေတာမျိုးကနဂိုကယ်တင်ခြင်းမရခဲ့သူတွေပါ။
၁ယော၃:၉-၁၀ ဘုရားသခင်ဖြစ်ဖွားစေတော်မူသောသူ မည်သည်ကား၊ ဒုစရိုက်ကိုမပြုတတ်။ အကြောင်းမူကား၊ ထိုသူ၌ မျိုးစေ့တော်တည်လျက်ရှိ၏။ ထိုသူသည် ဘုရားသခင်ဖြစ်ဖွားစေတော်မူသောသူ ဖြစ်သောကြောင့် ဒုစရိုက်ကိုမပြုနိုင်။- ထိုသို့သောလက္ခဏာအားဖြင့် ဘုရားသခင်၏သားတို့နှင့် မာရ်နတ်၏သားတို့သည် ထင်ရှားကြ၏။ ဖြောင့်မတ်ခြင်းတရားကို မကျင့်သောသူ၊ မိမိညီအစ်ကိုကို မချစ်သောသူ မည်သည်ကား၊ ဘုရားသခင်နှင့်မဆိုင်။